Kocha wa Lesotho ajipanga kuwaua Cape Verde

Lesotho wamebakisha ushindi wa mechi moja tu kufuzu katika michuano ya AFCON kwa mara ya kwanza katika historia ya soka lao. 

Kocha wao raia wa Afrika Kusini Moses Maliehe ameamua kutumia rasimali za nchini kwake ili kuiwezesha Lesotho kufuzu michuano hiyo.

Maliehe anaamini atafanya vizuri kwenye mchezo huo dhidi ya Cape Verde utakaochezwa katika ardhi ya Praia nchini Cape Verde, uwanja ule ule ambao Bafana Bafana waliaibishwa mwaka 2017 wakifungwa 2-1 na Cape Verde katika mechi ya kufuzu kombe la Dunia 2018.

Kocha huyo wa Lesotho alisafiri mpaka Johannesburg kuongea na Thabo Senong, ambaye alikuwa msaidizi wa Stuart Baxter kipindi hicho Bafana Bafana wanacheza na Cape Verde, kwa lengo la kupata dodoso mbalimbali kuelekea mechi hiyo. .

“ Nilimtembelea Thabo mjini Joburg, tukakaa chini na kuongea. Niliangalia mechi ya South Africa na Cape Verde ya Durban na nikapata baadhi ya vitu hapo “ alisema kocha huyo. 

Maliehe pia anaripotiwa kukutana na kocha wa Orland Pirates Milutin Sredojevich ‘Micho’ ambaye aliwafahamu vizuri Cape Verde kipindi alichofundisha timu ya Taifa ya Uganda.

Lesotho wameshika mpini, Tanzania imeshika kwenye makali, Jumapili hii machi 24 Tanzania inahitaji kushinda na kuombea Lesotho wasishinde ili wafuzu , wakati Lesotho wao wanataka kushinda tu ili waende Misri.