REFA CLATTENBURG AMEELEZA KUWA SALAH ANATABIA YA KUJIANGUSHA APATE PENATI ZA BURE

Mwamuzi wa zamani wa mechi za mashindano mbalimbali ya mpira wa miguu nchini Uingereza Mark Clattenburg ameamua kueleza ukweli kwa nini mchezaji wa Liverpool Mohamed Salah anapenda kuanguka chini kirahisi wakati wa mechi katika matukio ambayo pengine sio faulo.

Mark ameeleza kuwa mchezaji huyo amekuwa na tabia ya kudanganya au kujiangusha kirahisi anapokuwa katika eneo la hatari kutokana na kutaka kupata penati katika michezo ambayo anakuwa amekosa kufunga, Mark anaeleza kuwa Salah anafanya michezo hiyo kwa lengo la kujiongezea magoli kutokana na kuwa anajua kabisa ikitokea penati yeye ndio mpigaji wa Liverpool.
.
“Salah amekuwa akituhumiwa kujiangusha chini wakati wa mechi kirahisi tu kwa ajili ya kujipatia penati katika michezo dhidi ya Arsenal na Newcastle, katika mechi zote hizo alikuwa hana nafasi ya kufunga hivyo anaonekana kama anaamua kujitafutia penati na kwa kuwa yeye ni mpigaji wa penati wa Liverpool hivyo atapewa apige na kujiongezea idadi ya mabao ili kujiongezea nafasi ya kushinda kiatu cha dhahabu” alisema mwamuzi Mark

Hadi sasa Mohamed Salah wa Liverpool ndio mchezaji anayeongoza kwa mabao Ligi Kuu England, akiwa tayari amefunga mabao 16 katika msimamo wa wafungaji wa Ligi Kuu England msimu huu, akiwa kawazidi Harry Kane wa Tottenham na Aubameyang wa Arsenal kwa tofauti ya mabao mawili tu.